پھر سے سارے ایک ہوجاؤ یومِ پاکستان مناؤ
آؤ بھریں نفرت کے گھاؤ یومِ پاکستان مناؤ

یاد کرو اُنّیس سو چالیس ایک ہوئے تھے سارے جب
آزادی کی راہ میں یکسُو پاک زمیں کے تارے سب
ایک ہی جانب بہتے تھے ہر ایک زباں کے دھارے تب
جیت مقدّر تھی اپنی ہرگام پہ تب ہم ہارے کب
نفرت کی دیواریں ڈھاکر چاہت کی بستی میں آؤ

پھر سے سارے ایک ہوجاؤ یومِ پاکستان مناؤ

کچھ مانو نہ مانو لیکن سچّائی تسلیم کرو
سب کی رائے اہم ہوتی ہے ہر اِک کی تعظیم کرو
چھوٹی چھوٹی باتوں پر یوں خود کو مت تقسیم کرو
مت بھولو اکھتّرکو ہر صوبے کی تکریم کرو
آج بھی رِستا رہتا ہے دو لخت ہونے کا کاری گھاؤ

پھر سے سارے ایک ہوجاؤ یومِ پاکستان مناؤ

سازش وازش ٹھیک مگر ہم خود بھی اپنے ساتھ نہیں
اِک رستے کے راہی ہیں ہم پر ہاتھوں میں ہاتھ نہیں
دیس ہمارا گھر ہے بھائی رستہ یا فُٹ پاتھ نہیں
پاکستانی ہیں ہم صفدؔر ، جسونت، پِیٹر ، ناتھ نہیں
اپنے اپنے رنگ بھلادو بس پاکستانی کہلاؤ

آؤ بھریں نفرت کے گھاؤ یومِ پاکستان مناؤ