ایک بار پھر کچھ انسانی بھیڑیوں نے میرا بدن ادھیڑا ہے۔میں اسپتال کے بستر پر اپنے ہی خون میں لت پت زندگی کی سانسیں گن رہی ہوں۔ ہوش سنبھالنے پر انسانوں کی دنیا سے میرا پہلا تعارف یہ ہوا ہے کہ یہاں انسانی بھیڑیے بستے ہیں جو ہر لمحے میمنوں کی تلاش میں رہتے ہیں۔

تم نے میری ماں کی آنکھیں دیکھی ہیں؟ پھٹی پھٹی، دہشت زدہ ڈبڈبای آنکھیں۔ اور مرے باپ کی زندگی سے محروم ، پتھرائی ہوئی، خشک، بے اعتبار آنکھیں۔ میری مجروح روح اپنے ماں باپ کے ہلتے لبوں کو محسوس کر رہی ہے، جو میرے مر جانے کی دعائیں مانگ رہے ہیں۔

بہت سے لوگ مجمع لگاۓ، امتحانی پرچوں جیسے مشکل سوالات لئے، کیمروں کے ساتھ ہمارے گرد منڈلا رہے ہیں۔ تاکہ ہمارے وجود اور ہماری کہانی کو لوگوں کے ذہنوں میں اتنی اچھی طرح سے نقش کر دیں ، کہ وہ ہمیشہ ہمیشہ ہمیں یاد رکھیں۔ ترس کھاتے ، ترحم اور حقارت سے لبریز نگاہوں والے لوگ۔ یہ سب ہم کو خوب اچھی طرح یاد رکھیں گے، اور اگر میں بچ گئی،تو کل ان کی خشمگیں نگاہوں میں میرے لئے نفرت اور بے گانگی ہو گی۔جب میں ان کی بیٹی کے ساتھ کھیلنا چاہوں گی تو وہ اسے کھینچ کر مجھ سے یوں دور لے جائیں گے جیسے میں کوئی اچھوت ہوں، جسے کوئی متعدی بیماری لاحق ہو۔ مرے لئے نہ ان کے گھروں میں کوئی جگہ ہوگی نہ دلوں میں۔ میرا جی چاہتا ہے کہ دھکے دے کر ان سب کو یہاں سے دور ہٹا دوں، جنھیں نے مرے لہو لہان بدن کی پرواہ ہے، نہ مردوں سے بدتر میرے ماں باپ کے جذبات کا احساس۔ ان سب کو یہاں سے دور ہٹا دوں تاکہ مرے ماں باپ اطمینان سے میری موت کی دعائیں مانگ سکیں۔

تم کہتے ہو، کہ موت کی دعائیں نہ مانگو، ہم تم کو انصاف دلائیں گے۔ذمہ داروں کو بے نقاب کریں گے اور مجرموں کو سزا دیں گے۔ میرے ماں باپ کی آنکھوں کی بے یقینی و بے اعتباری یہ سوال کرتی ہے کہ کیا واقعے ایسا ہو سکے گا؟

اس معاشرے میں جہاں اے روز کتنی معصوم بچیاں اور بچے اور عورتیں ہوس پرستوں کا شکار بنتی ہیں ، اور قانون کے محافظ، سپاہی، منصف۔ حکمران، آرام اور چین کی نیند سوتے ہیں۔کیا واقعی یہ سپاہی ان درندوں کو گرفتار کر پایں گے؟ ، وہی سپاہی جن کے ہوتے دن دہاڑے لوگ لٹتے ہیں، قتل ہوتے ہیں، برباد ہوتے ہیں، اور مجرم ہمیشہ نامعلوم رہتے ہیں؟ اور اگر وہ گرفتار ہو گئے، تو کوئی امیر وزیر، افسر، سیاست دان، وڈیرہ ان کا رشتہ دار بن کر ان کو بچا نہیں لے جاے گا؟ اور اگر ان پر مقدمہ چلا تو ان عدالتوں کا گلا سڑا نظام مدتوں اس مقدمے کو نہیں گھسیٹے گا؟ ظالم کو مہلت اور مظلوم کو تھکن کے سوا کچھ اور بھی ملے گا؟ جنگلوں سے بدتر جن معاشروں میں ظالم کو یقین ہو کہ اس کا ہاتھ روکنے والا کوئی نہیں، تو وہ کیوں نہیں پوری ڈھٹائی اور بے خوفی سے جرم کرتا چلا جائے۔

اور کیا کسی کا دھیان اں شیطانی کاروبار کرنے والوں کی طرف بھی جاےگا جو صبح و شام چمکتی سکرینوں پر ظلم وتشدد اور فحش مناظر سے بھرپور فلمیں چلا کر رکھتے ہین۔ ٹیوی اور کمپیوٹر پر شیطانیت کا ایسا جہنم بھڑکایا جاتا ہے جس میں حرمت، حیا، شرافت، پاکیزگی رحمدلی، انسانی رشتوں کا تقدس غرض یہ کہ ہر لطیف جذبہ اورانسانی اقدار جل کر بھسم ہو جاتی ہے۔ اس جہنم سے اپنے اندر چھپے شر کو اور بھڑکانے والے کتنے ہی ذہنی مریض بھیانک بلاؤں کی صورت بستیوں میں پھیل جاتے ہیں۔ ایسے ذہنی مریضوں کا شکار کمزور بچے اور عورتیں ہی ہوتی ھیں۔ ان عفریتوں کی جھلساتی نگاہوں کی تپش میں ہر ان ہمارے وجود کو جھلساتی ہے۔ کوئی ہے جو ان کو روکے؟ کوئی ہے جو ان کی آگ کو بھڑکانے والوں کے گریبان پکڑے؟

وہ خدا جو مجھے یقین دلاتا ہے کہ ایک روز اے گا، جب زندہ گاڑی لڑکی سے پوچھا جاے گا کہ تو کس قصور میں ماری گئی۔ اس خدا اور اس کے حضور جوابدہی کے اس یقین کو جس سے بڑھ کر کوئی چیز انسان کو ظلم سے باز رکھنے والی نہیں، کون دلوں میں اتارنے والا ہے۔ کون ہے جو خدا کی تعلیمات کے ذریعے انسان کی بہیمتوں کو دبانا اور روحانی بلندیوں کی طرف لے جانا سکھاے؟۔ نہ والدین، نہ استاد، نہ ادارے نہ معاشرے۔ نتیجہ یہ ہے کہ ہر شخص اپنے پیٹ اور فرج کی بھوک کو مٹانے کی خاطر اندھادھند بھاگا جا رہا ہے۔ اور بھوک ہے کہ بڑھتی جاتی ہے۔

ہماری بستیاں ایسا جنگل بن گئی ہیں، جہاں انسانوں کو شر سے روکنے کے لئے نہ کوئی خارجی قوت موجود ہے نہ ہی داخلی۔ جس کے ہاتھ میں اقتدار و اختیار کے سرکش گھوڑے کی لگامیں ہیں،وہ اس کے سموں تلے راہ میں انے والے ہر کمزور کو روندتا چلا جاتا ہے۔ ایسے میں مظلوموں کی بے اعتبار نگاہیں یہ سوال کرتی ہیں، کہ کیا تم اس یتیموں ، مظلوموں اور عورتوں کے نجات دہندہ کی مانند زندہ گاڑی جانے والیوں کو بچا سکو گے؟ کیا واقعے تم وہ وقت لا سکو گے، جب ایک عورت تنہا صںعا سے حضر موت تک ، سونا اچھالتی سفر کرے، اور کوئی اسے نہ تنگ کرے؟

اگر تم مجھے یقین دلا سکو تو ٹھیک ہے، ورنہ ہمیں تنہا چھوڑ دو کہ میرے ماں باپ میری موت کی دعا کریں۔۔۔ کہ ایک روز تو آنا ہی ہے جب سوال کرنے والا مجھ سے سوال کرے گا۔۔ “تو کس قصور میں ماری گئی؟”